කටුනායකට හෙටත් නිවාඩු..!

කටුනායක නිදහස් වෙළඳකලාපය හෙට දිනයේද වසා තැබීමට රජය තීරණය කර තිබේ. ඒ අනුව නිදහස් වෙළඳකලාපයේ කටයුතු ජූනි මස 02 වන දින සිට යළි ආරම්භ කරන බව ආයෝජන මණ්ඩලයේ විධායක අධ්‍යක්ෂ සුනිල්ද සිල්වා මහතා අද දෙරණට කියා සිටියේය.

ඊයේ දවසේ යෝජිත විශ්‍රාම වැටුප් පනත් කෙටුම්පතට එරෙහිව උද්ඝෝෂණයේ නිරත වූ නිදහස් වෙළඳ කලාපයේ සේවක සේවකාවන් හා පොලීසිය අතර ඇති වූ ගැටුමෙන් පොලිස් නිලධාරීන් 15 දෙනෙකු පමණද,සේවක සේවිකාවන් ගණනාවක්ද තුවාල ලබා රෝහල් ගත කෙරිණි.

තත්ත්වය සමථයකට පත් කොට ප්‍රදේශයේ නීතිය හා සාමය තහවුරු කරනු පිණිස අද දිනයේ නිදහස් වෙළඳකලාපය වසා තබන බව රජය නිල වශයෙන් ඊයේ නිවේදනය කරන ලදී.

එසේ වුවද කටුනයාක පැවති වෘත්තිය සමිති අරගලයට සහයෝගය පළ කරනු පිණිස අන්තර් සමාගම් සේවක සංගමය විසින් අද දවසේ බියගම නිදහස් වෙළඳකලාපයේ උද්ඝෝෂණ ව්‍යාපාරයක් පවත්වන ලදී. 

තව කියවන්න.. »

වැඩකරන ජනතාව නිහඩව බලා සිටි කාලය අවසන්

මෙරට වැඩකරන ජනතාව නිහඩව බලා සිටි කාලය මේ වන විට අවසන්ව ඇතැයි එක්සත් ජාතික පක්ෂය පවසයි.

පාර්ලිමේන්තුවේ බහුතර බලයකින් යම් පනතක් සම්මත කරගැනීමට පමණක් රජයට හැකි බව එම පක්ෂයේ පාර්ලිමේන්තු මන්ත්‍රී ජෝශප් මයිකල් පෙරේරා මහතා ප්‍රකාශ කළේය.

නමුත් එකී පනත මගින් මෙරට වැඩකරන ජනතාවට යම් අහිතක් සිදුවන්නේ නම් ඔවුන් ඊට එරෙහිව අරගලයට පිවිසීම වැළැක්විය නොහැකි බව මන්ත්‍රීවරයා පෙන්වාදෙයි.

ඊයේ(30) කටුනායක විරෝධතාවයට එල්ල වූ ප්‍රහාරය හෙළා දකිමින් කොළඹ දී අද(31) පැවති මාධ්‍ය හමුවකට එක්වෙමින් ජෝශප් මයිකල් පෙරේරා මන්ත්‍රීවරයා මේ අදහස් පළ කළේය. 

තව කියවන්න.. »

නොමග යවන්න බැරි වුණාම මර්දනය දැඩි කරනවා

තමන්ගේ අයිතිවාසිකම් වෙනුවෙන් ප්‍රජාතන්ත්‍රවාදී හා සාමකාමී ලෙස පෙනී සිටි සේවක සේවිකාවන්ට ප්‍රහාර එල්ල කිරීම හෙලාදකින බව ජනතා විමුක්ති පෙරමුණ පවසයි. ජනතා විමුක්ති පෙරමුණේ දේශපාලන මණ්ඩලය විසින් නිකුත් කළ නිවේදනයක මේ බව සඳහන් වේ. එකී නිවේදනය පහත පරිදිය.

පෞද්ලික අංශයේ සේවක සේවිකාවන්ගේ බලවත් විරෝධය නොසලකා ආණ්ඩුව විසින් සම්මතකර ගැනීමට උත්සාහ කරන සේවක විශ‍්‍රාම වැටුප් පනතට එරෙහිව අද(30)කටුනායක නිදහස් වෙළඳ කලාපය ආශ‍්‍රිතව පැවැති සාමකාමී උද්ඝෝෂණයට ආණ්ඩුව පොලීසිය ලවා පහර දී වෙඩි තැබීමෙන් උද්ඝෝෂණයට සහභාගී වූවන් රැසක් තුවාල ලබා තිබේ.

ඉන් නොනැවතුණු ආණ්ඩුව ආරක්‍ෂක සේවා යොදවමින් කටුනායක වෙළඳ කලාපයේ කර්මාන්ත ශාලාවලට කඩා පනිමින් එහි සේවය කරන සේවක සේවිකාවන් බලහත්කාරයෙන් රැගෙන ගිය බවද වර්තාවේ.

සිය සාධාරණ අයිතීන් වෙනුවෙන් සාමකාමී ලෙස උද්ඝෝෂණයේ යෙදුණු වෙළඳ කලාප සේවක සේවිකාවන් වෙත එල්ල කරන ලද ආණ්ඩුවේ අමානුෂික ප‍්‍රහාරය හා ඔවුන් වෙත මුදාහරිම්න් තිබෙන මර්දනය දැඩි පිළිකුලෙන් යුතුව හෙළා දකින අපි, නිදහස් වෙළද කලාප සේවක සේවිකාවන්ට එරෙහිව ක‍්‍රියාත්මක කර තිබෙන ආණ්ඩුවේ මර්දනය වහාම නවත්වන ලෙස බලකර සිටිමු.

පෞද්ගලික අංශයේ සේවක සේවිකාවන්ගේ යහපතට යැයි කියමින් ආණ්ඩුව විසින් සම්මත කිරීමට සැරසෙන විශ‍්‍රාම වැටුප් පනත ඉතාම පැහැදිලි ලෙස ජාත්‍යන්තර මූල්‍ය අරමුදලේ හා අධිරාජ්‍යවාදී වුවමනාවන්ට අනුව ගෙනෙන හා ආණ්ඩුවේ මුල්‍ය අර්බුදය සේවක වැටුප් අරමුදල්වලින් විසඳා ගැනීම සඳහා ගෙනෙන එකක් බව දැන් හොඳින් පැහැදිලි වී තිබේ.

පෞද්ගලික අංශයේ සමස්ත සේවක සේවිකාවන්ගේම විරෝධය නොසලකා හිතුවක්කාරී ලෙස හා අත්තනෝමතික ලෙස මෙම විශ‍්‍රාම වැටුප් පනත කෙසේ හෝ සම්මත කර ගැනීමට ආණ්ඩුව දරන උත්සාහයෙන්ම පෙනී යන්නේ, මෙය සේවකයින්ගේ යහපත සඳහා ගෙනෙන්නක් නොව ආණ්ඩුව වෙනුවෙන්ම ගෙන එන්නක් බවය.

මෙම විශ‍්‍රාම වැටුප් ප්‍රෝඩාවට එරෙහිව රට පුරා නිර්මාණය වී ඇති දැවැන්ත විරෝධය තේරුම් ගන්නවා වෙනුවට පෞද්ගලික අංශයේ සේවක සේවිකාවන්ගේ හඬට, වෘත්තීය සමිතිවල හඬට ඇහුන්කම් දෙනවා වෙනුවට ආණ්ඩුව එක් අතකින් තම මැති ඇමැතිවරුන් ලවා බොරු පැහැදිලි කිරීම් කරවමින් සේවකයින් නොමග යැවීමටද එසේ නොහැකි වූ විට ඔවුන් වෙත මර්දනය මුදාහැර ඔවුන් බියවද්දා තම අරමුණ ඉටු කර ගැනීමටද කටයුතු කරන බව පෙනේ.

එසේම සේවක අරගල මර්දනය කිරීම සඳහා ආණ්ඩුව විවිධ උපක‍්‍රම හා කුමන්ත‍්‍රණ ක‍්‍රියාත්මක කිරීමට උත්සාහ දරන බවද පෙනේ. එබැවින් ඒ පිළිබඳ බරපතළ අවධානයෙන් සිටින ලෙස අපි පෞද්ගලික අංශයේ සේවක සේවිකාවන්ගෙන්ද ඉල්ලා සිටිමු.

අවසාන වශයෙන් සේවක හඬට ඇහුන්කම් නොදී හිතුවක්කාර ලෙස හා අත්තනෝමතික ලෙස විශ‍්‍රාම වැටුප් පනත සේවකයින් මත බලෙන් පැටවීමට ආණ්ඩුව ගන්නා උත්සාහයත් ඊට එරෙහිව සාමකාමී ලෙස උද්ඝෝෂණය කළ වෙළඳ කලාප සේවක සේවිකාවන්ට පොලීසිය ලවා ප‍්‍රහාර එල්ල කරමින් බරපතළ තුවාල සිදුකරමින් හා අත්අඩංගුවට ගනිමින් කරගෙන යන දැඩි මර්දනයත් දැඩි පිළිකුලෙන් යුතුව යළි යළිත් හෙළා දකින අපි, සේවක මර්දනය වහාම නතර කරන ලෙසත් සේවක විශ‍්‍රාම වැටුප් ප්‍රෝඪාව වහාම හකුළා ගන්නා ලෙසත් ආණ්ඩුවට බලකරමු. 

තව කියවන්න.. »

පුද්ගලයින් 24 000 ක් අවතැන්

ජල ගැලීම් වලින් විපතට පත්වු ජනතාවට ත්‍රිවිධ හමුදාව සමඟ එක්ව සහන සැලසීමට පියවර ගෙන ඇතැයි ආපදා කළමනාකරණ මධ්‍යස්ථානය පවසයි.

මේ වන විට පුද්ගලයින් 24,000ක් පමණ විපතට පත්ව සිටින අතර අවතැන් කඳවුරු හයක පුද්ගලයන් පන්සිය දෙනෙකු පමණ රැඳී සිටින බව ආපදා කළමනාකරණ මධ්‍යස්ථානය සඳහන් කරයි.

මේ අතර ජලගැල්මෙන් විපතට පත්වූවන්ට සහන සැලසීම සඳහා අවිස්සාවේල්ල සහ යටියන්තොට ප්‍රදේශවලට පිටත් කර තිබු නාවික හමුදා කණ්ඩායම් යළි ගෙන්වා ගැනීමට පියවර ගෙන තිබේ.

නාවික හමුදා මාධ්‍ය ප්‍රකාශක කමාන්ඩර් කෝසල වර්ණකුලසූරිය මහතා සඳහන් කර සිටියේ ආපදා තත්ත්වය පහව යාම හේතුවෙන් මෙම තීරණය ගත් බවයි. 

තව කියවන්න.. »

දුම්රිය වෘත්තීය ක්‍රියාමාර්ගය ගැන විධිමත් පරීක්ෂණයක්

දුම්රිය රියදුරු සහායකවරුන් ආරම්භ කර ඇති ‍සේවයෙන් බැහැරව සිටීමේ වෘත්තීය ක්‍රියාමාර්ගය සම්බන්ධයෙන් විධිමත් පරීක්ෂණයක් පවත්වන බව දුම්රිය සාමාන්‍යාධිකාරී ජී.ඒ. මහානාම මහතා පවසයි.

වෘත්තීය ක්‍රියාමාර්ගයට හේතු වී තිබෙන සිද්ධියට අදාළ පාර්ශව සමග අද(20) දිනයේ ද සාකච්ඡා පවත්වන බව ඔහු සඳහන් කරයි.

දුම්රිය රියදුරු සහායකවරයෙකුට පහරදීමේ සිද්ධියකට විරෝධය පළ කිරීමේ අරමුණින් දුම්රිය සහායකවරුන් පසුගිය 18 වැනි දින මෙම වෘත්තීය ක්‍රියාමාර්ගයට පිවිසුණි.

කෙසේවෙතත් දුම්රිය ගමනා ගමන කටයුතු නිසි පරිදි සිදුකිරීමට අවශ්‍ය පියවර ගෙන ඇති බව මහානාම මහතා ප්‍රකාශ කළේය.

තව කියවන්න.. »

කර්මාන්ත ගැටලු විසඳීමට විශේෂ ඒකකයක්

මෙරට කර්මාන්තකරුවන් සහ අපනයනකරුවන් මුහුණ දෙන ගැටලු විසඳීම සඳහා විශේෂ ඒකකයක් පිහිටුවීමට සැලසුම් කර තිබේ.

කර්මාන්ත හා වාණිජ කටයුතු අමාත්‍යාංශය සහ අපනයන සංවර්ධන මණ්ඩලය එක්ව මෙම ඒකකය පිහිටුවන බව අමාත්‍ය රිෂාද් බදියුදීන් මහතා ප්‍රකාශ කළේය.

මෙම ඒකකයේ කටයුතු සඳහා අදාළ අනෙකුත් අමාත්‍යාංශ වාණිජ මණ්ඩලය නිෂ්පාදකයින්ගේ සහ අපනයකරුවන්ගේ සංගම් හා රේගුව වැනි ආයතන සම්බන්ධ කර ගැනීමට ද අපේක්ෂිතය.

ජූනි මාසයේ සිට ක්‍රියාත්මක කිරීමට නියමිත මෙම විශේෂ ඒකකය මගින් අපනයන ඉලක්ක කර ගත් කර්මාන්ත වලට ප්‍රමුඛත්වය ලබා දෙන අතර සුළු හා මධ්‍ය පරිමාණ කර්මාන්තකරුවන්ගේ ගැටලු සඳහා ද විශේෂ අවධානයක් යොමු කරන බව අමාත්‍යවරයා සදහන් කළේය.

තව කියවන්න.. »

ෆොන්සේකාට දෙසතියක විවේකයක් ඕනෑ-විශේෂඥ වෛද්‍ය වාර්තාව කියයි

ප්‍රජාතන්ත්‍රවාදී ජාතික සන්ධානයේ නායක සරත් ෆොන්සේකා මහතාට සතියක හෝ දෙකක විවේකයක් අත්‍යවශ්‍ය බවට විශේෂඥ වෛද්‍ය වාර්තාවෙන් නිර්දේශ කර ඇතැයි එම පක්ෂයේ පාර්ලිමේන්තු මන්ත්‍රී ටිරාන් අලස් මහතා පවසයි.

එසේම බෝම්බ ප්‍රහාරයකට ලක්වීමෙන් පෙණහළුවලට බලවත් සේ හානි සිදුව ඇති බැවින් දූවිලි ඉතා අහිතකර බවත්,එබැවින් බන්ධනාගාරය තුළ දූවිලි නොමැති කුටියක ඔහුව රැඳවිය යුතු බවත් විඥේෂඥ වෛද්‍යවරයා නිර්දේශ කර ඇතැයි හෙතෙම සඳහන් කරයි.

පසුගිය දින කිහිපයක සිට සරත් ෆොන්සේකා මහතා අසනීප තත්ත්වයේ පසුවන බැවින් අද(16)දිනයේද විශේෂඥ වෛද්‍ය වජිර තෙන්නකෝන් මහතා හමුවට යොමු කළ බවද මන්ත්‍රීවරයා කියා සිටියි.

සරත් ෆොන්සේකා මහතා පසුගිය බ්‍රහස්ප්‍රතින්දා කොළඹ පෞද්ගලික රෝහලකට ඉදිරිපත් කිරීමෙන් පසු වෛද්‍ය පරීක්ෂණයකට භාජනය කළ බවත්,එකී විශේෂඥ වෛද්‍ය වාර්තාව අද දිනයේ ලැබුණු බවත් ටිරාන් අලස් මහතා සඳහන් කළේය.

එම වෛද්‍ය වාර්තාව අධිකරණයට ඉදිරිපත් කර ෆොන්සේකා මහතාට සහනයක් ලබා ගැනීමට අපේක්ෂා කරන බව ප්‍රජාතන්ත්‍රවාදී ජාතික සන්ධානයේ පාර්ලිමේන්තු මන්ත්‍රී ටිරාන් අලස් මහතා වැඩිදුරටත් කියා සිටියේය.

තව කියවන්න.. »

ජාත්‍යන්තර මූල්‍ය අරමුදලේ ලොක්කාටත් අපචාර චෝදනා

ජාත්‍යන්තර මූල්‍ය අරමුදලේ ප්‍රධානී ඩොමිනික් ස්ට්‍රව්ස්ගෙන් නිව්යෝර්ක් පොලිසිය විසින් ප්‍රශ්න කර ඇතැයි විදෙස් මාධ්‍ය උපුටා දක්වයි.

ඔහුට එරෙහිව ඉදිරිපත්ව ඇති ලිංගික අතවර චෝදනාවක් ඊට හේතුව බව සඳහන් වේ.

ඔහු නිව්යෝර්ක් හී රැඳී සිටි හෝටලේ සේවිකාවක විසින් මේ සම්බන්ධයෙන් පැමිණිලි කර ඇති බව අමෙරිකානු මාධ්‍ය වාර්තා කරයි.

මූල්‍ය අරමුදලේ ප්‍රධානීයා පැරීසිය බලා පිටත්ව යාමට ජෝන් එෆ් කෙනඩි ගුවන් තොටුපලේ ප්‍රංශ ගුවන් සේවයට අයත් යානයක රැඳී සිටිය දී ප්‍රශ්න කිරීම සඳහා රැගෙන ගොස් තිබේ.

කෙසේ වෙතත් ඔහුට එරෙහිව පොලිසිය විසින් මෙතෙක් චෝදනා ඉදිරිපත් ‍කර නොමැති බව වේ.

ඔහුගෙන් ප්‍රශ්න කිරීම් සිදු කෙරෙමින් පවතින අතර සිද්ධිය සම්බන්ධයෙන් ජාත්‍යන්තර මූල්‍ය අරමුදල මෙතෙක් කිසිදු ප්‍රකාශයක් සිදු කර නැත.

තව කියවන්න.. »

කල් දැමූ ඡන්දය 2010 නාමලේඛනය යටතේ පැවැත්වීම හොඳ ප්‍රවණතාවක්

2010 ඡන්ද හිමි නාමලේඛනය යටතේ කල් දැමූ පළාත් පාලන ආයතනවල මැතිවරණය පැවැත්වීමට තීරණය කිරීම යහපත් ප්‍රවණතාවක් බව කැෆේ සංවිධානය පවසයි.

‍ 2009 වර්ෂයට සාපේක්ෂව 2010 වර්ෂයේ දී විශාල පිරිසක් ඡන්ද හිමි නාමලේඛනයට ඇතුළත් වී ඇති බව එම සංවිධානයේ විධායක අධ්‍යක්ෂ කීර්ති තෙන්නකෝන් මහතා සඳහන් කරයි.

‍ ඒ හේතුවෙන් ඡන්දය භාවිත කරන පිරිස වැඩිවන බව කීර්ති තෙන්නකෝන් මහතා පෙන්වා දෙයි.

‍ පසුගිය යුධ ගැටුම් පැවති කාලය තුළ යාපනය සහ කිලිනොච්චි ප්‍රදේශවල ඡන්ද හිමිනාමලේඛන වලට සිය නම් ඇතුළත් කර ගැනීමට බොහෝ පිරිසකට නොහැකි වූ බව ඔහු වැඩිදුරටත් කියා සිටියේය.

‍ එහෙත් 2010 වර්ෂයේ ඡන්ද හිමි නාමලේඛනය යට‍තේ එම ප්‍රදේශවල විශාල පිරිසකට ඡන්දය භාවිත කිරීමට අවස්ථාව උදාවී ඇති බව කීර්ති තෙන්නකෝන් මහතා වැඩිදුරටත් ප්‍රකාශ කළේය.

තව කියවන්න.. »

සෞන්දර්යය සරසවි සංගීත පීඨයත් ස්වේච්ඡා තනතුරු අතහරියි

විශ්ව විද්‍යාල ආචාර්යවරුන්ගේ සංගමය ගෙන යන වෘත්තීය ක්‍රියාමාර්ගයට එක්වීමට සෞන්දර්ය විශ්ව විද්‍යාලයේ සංගීත පීඨ ආචාර්ය මණ්ඩලය තීරණය කර තිබේ.

අද(10) පැවති විශේෂ සාකච්ඡාවකින් අනතුරුව මෙම තීරණයට එළඹි බව සංගීත පීඨ ආචාර්යවරුන්ගේ සංගමයේ සභාපති කථිකාචාර්ය ආරියරත්න ලංසකාර මහතා පැවසු‍වේය.

ඒ අනුව නේවාසිකාගාර පාලකවරු, ශිෂ්‍ය උපදේශකවරු, ස්වේච්ඡා තනතුරු දරණ අංශ ප්‍රධානීන් අදාළ තනතුරුවල ඉල්ලා අස්වීමේ ලිපි පීඨාධිපතිවරයා වෙත අද දිනයේ යොමු කළ බව ලංසකාර මහතා සඳහන් කළේය.

විශ්ව විද්‍යාල ආචාර්යවරුන්ගේ සංගමයේ වෘත්තීය ක්‍රියාමාර්ගය සඳහා මීට පෙර එක්වීමට සූදානමින් සිටිය ද තාක්ෂණික ගැටලුවක් හේතුවෙන් එය ප්‍රමාද වූ බව ලංසකාර මහතා වැඩිදුරටත් ප්‍රකාශ කළේය.

තව කියවන්න.. »

වෘත්තීය ක්‍රියා මාර්ග ගත් ආචාර්යවරුන්ගේ තොරතුරු ඉල්ලයි

වෘත්තීය ක්‍රියා මාර්ගයකට අවතීර්ණ වී සිටින විශ්ව විද්‍යාල ආචාර්යවරුන් සම්බන්ධයෙන් තොරතුරු ලබා දෙන ලෙසට ඒ ඒ විශ්ව විද්‍යාල වල උපකුලපතිවරුන්ට මේ වන විට දැනුම් දී ඇතැයි විශ්ව විද්‍යාල ප්‍රතිපාදන කොමිසන් සභාව පවසයි.

මෙම වෘත්තීය ක්‍රියා මාර්ගය කිසි විටෙකත් අනුමත නොකරන බව එම කොමිසන් සභාවේ සභාපති මහාචාර්ය ගාමිණි සමරනායක මහතා සඳහන් කළේය .

ආචාර්යවරුන් පවසන ආකාරයේ ස්වේච්ඡා තනතුරු කිසිසේත් විශ්ව විද්‍යාලය තුළ නොපවතින බව ගාමිණි සමරනායක මහතා කියා සිටියේය.

තනතුරු වලින් ඉවත්වීමට ආචාර්යවරුන් ක්‍රියා කර ඇත්නම් නව චක්‍රලේඛයට අනුව ඔවුන්ට එරෙහිව ක්‍රියා මාර්ග ගන්නා බව ඔහු වැඩිදුරටත් පෙන්වාදුන්නේය.

තව කියවන්න.. »

දරුස්මාන් වාර්තාව එක්සත් ජාතීන්ගේ ප්‍රඥප්තියට පටහැනියි

දරුස්මාන් වාර්තාව මෙරට ව්‍යාවස්ථාවට මෙන්ම එක්සත් ජාතීන්ගේ ප්‍රඥප්තියට පටහැනිව සකස් වූවක් බව ශ්‍රී ලංකා නිතීඥ සංගමය පවසයි.

මෙම වාර්තාව සකස් කිරීමට යෝජනා කළ අවස්ථාවේ දී පවා සිය සංගමය ඊට විරෝධය පළ කළ බව එම සංගමයේ ලේකම් ජ්‍යෙෂ්ඨ නීතීඥ මහින්ද ලොකුගේ මහතා සඳහන් කළේය.

අදාළ වාර්තාවට නීතිමය වලංගුතාවයක් නොමැති බැවින් ඊට විරෝධය පළ කිරීමට සිය සංගමයේ නීතීඥවරුන් අද(07) ඒකමතිකව තීරණය කළ බව ඔහු කියා සිටියේය.

නීතීඥ මහින්ද ‍ලොකුගේ මහතා මේ අදහස් පළ කළේ කොළඹ දී අද(07) පැවති මාධ්‍ය හමුවකට සහභාගී වෙමිනි.

දරුස්මාන් වාර්තාවට‍ විරෝධය පළ කරමින් සිය සංගමය විසින් සකස් කළ යෝජනා ජනාධිපතිවරයාට, පක්ෂ නායකයින්ට, තානාපතිවරුන්ට මෙන්ම එක්සත් ජාතීන්ගේ මහලේකම්වරයාට බාරදීමට කටයුතු කරන බව ඔහු වැඩිදුරටත් අවධාරණය කළේය.

තව කියවන්න.. »

ශ්‍රී ලංකා රජය පෙරළන්න අපට ඕන වුණේ නෑ

ශ්‍රී ලංකා රජය පෙරළීමට ඇමරිකාවට අවශ්‍යතාවයක් නොවූ බවත් අවශ්‍ය වූයේ ශ්‍රී ලංකාව සමග දීර්ඝ කාලීනව පැවති සබඳතාවය තවදුරටත් ආරක්ෂා කරගැනීම පමණක් බවත් දකුණු හා මධ්‍යම ආසියාතික කටයුතු භාර අමෙරිකානු සහකාර රාජ්‍ය ලේකම් රොබ්ට් ඕ බ්ලෙක් මහතා පවසයි.

අද විදේශ අමාත්‍ය, මහාචාර්ය ජී.එල් පීරීස් මහතා හමු වීමෙන් පසු මාධ්‍ය හමුවක් අමතමින් අමෙරිකානු සහකාර රාජ්‍ය ලේකම්වරයා මේ බව සඳහන් කර තිබේ.

ලොව සිටි දරුණුතම ත්‍රස්තවාදීන් දෙපළ ලෙස වේළුපිල්ලේ ප්‍රභාකරන් සහ ඔසාමා බින් ලාඩ්න් හැඳින්විය හැකි බවද හෙතෙම මෙහිදී පෙන්වා දී තිබේ.

එසේම 30 වසරක සිවිල් යුද්ධයෙන් පසු ශ්‍රී ලංකාව යළි නැඟී සිටින මේ මොහොතේ ඇමරිකාව ශ්‍රී ලංකාවට සුභ පතන බවත්,ශ්‍රී ලංකාවට නැඟී සිටීම සඳහා සහයදීමට ඇමරිකාව සූදානම් බවත් ඔහු කියා සිටියි.

තෙදින නිල සංචාරයක් සඳහා දිවයිනට පැමිණ සිටින අමෙරිකානු සහකාර රාජ්‍ය ලේකම් රොබ්ට් ඕ බ්ලෙක් මහතා ඊයේ කිලිනොච්චියේ සංචාරයක නිරත වූ අතර අමෙරිකාවේ සහය ඇතිව සිදු කෙරෙන බිම් බෝම්බ ඉවත් කිරීමේ ක්‍රියාවලිය ඔහුගේ නීරීක්ෂණයට ලක් වූ බව සඳහන්වේ.

තව කියවන්න.. »

ජාත්‍යන්තර වශයෙන් ඉතා දුෂ්කර අවස්ථාවකට පත්ව සිටින තත්ත්වයක් හමුවේ වගකිව යුතු විපක්ෂයක් ලෙස රටට ප්‍රමුඛත්වය ලබාදීමට කැපවන බව විපක්ෂ නායක රනිල් වික්‍රමසිංහ මහතා වි‍ශේෂ ප්‍රකාශයක් සිදුකරමින් අද(03) පාර්ලිමේන්තුවේ දී

ජාත්‍යන්තර වශයෙන් ඉතා දුෂ්කර අවස්ථාවකට පත්ව සිටින තත්ත්වයක් හමුවේ වගකිව යුතු විපක්ෂයක් ලෙස රටට ප්‍රමුඛත්වය ලබාදීමට කැපවන බව විපක්ෂ නායක රනිල් වික්‍රමසිංහ මහතා වි‍ශේෂ ප්‍රකාශයක් සිදුකරමින් අද(03) පාර්ලිමේන්තුවේ දී සඳහන් කළේය.

පක්ෂග්‍රාහී දේශපාලන වාසි සඳහා තමා ක්‍රියා නොකරන බව ඔහු අවධාරණය කළේය.

එවැන්නක් සඳහා ගෙවීමට සිදුවන වන්දිය ඉතා විශාල බව පවසන විපක්ෂ නායකවරයා අභියෝගයක් විය හැකි කරුණක් හමුවේ එක්සත්ව හා අභිමානවත්ව එයට මුහුණ දිය යුතු බව පවසයි.

විද්වත් කමිටු වාර්තාව ප්‍රසිද්ධියට පත්කර ඒ සඳහා ජගත් මහලේකම්වරයා එහි නිර්දේශ ක්‍රියාවට නංවමින් සිටින පසුබිමක අදාළ වාර්තාවට ශ්‍රී ලංකා රජය දැඩි ලෙස ප්‍රතිචාර දැක්විය යුතු බව වික්‍රමසිංහ මහතා පෙන්වාදෙයි.

ජාත්‍යන්තර ප්‍රජාව ඉදිරියේ නැගී සිටීමේ ප්‍රධාන සාධකය ජාතික සමගිය බව ද විපක්ෂ නායකවරයා මෙහිදී අවධාරණය කළේය.

තව කියවන්න.. »

ඔසාමා බිල් ලාඩන් මියයයි

අල් කයිඩා සංවිධානයේ නිර්මාතෘ සහ නායක ඔසාමා බිල් ලාඩන් මරණයට පත්ව ඇති බව විදෙස් මාධ්‍ය වාර්තා තහවුරු කරයි.

අමෙරිකානු ජනාධිපති බැරැක් ඔබාමා ද මේ බව තහවුරු කර ඇති බව වාර්තා වේ.

ඔසාමා බින් ලාඩ්න් අමෙරිකානුවන්ට අත්‍යව්‍යශ්‍යව සිටි ත්‍රස්තවාදී නායකයෙකි.

ත්‍රස්තවාදී ප්‍රහාර රැසක් මෙහෙය වීම සම්බන්ධයෙන් බින් ලාඩ්න්ට ‍එරෙහි‍ චෝදනා එල්ල වී ඇත.

2001 වසරේ සැප්තැම්බර් 11 වැනිදා නිව්යෝර්ක් සහ වොෂිංටන් නගර වෙත එල්ල කළ ත්‍රස්ත ප්‍රහාරයේ ප්‍රධාන සැකකරු වන්නේ ද ඔසාමා බින් ලාඩ්න්ය.

තව කියවන්න.. »

දින තුනක් වයසැති බිලිඳා දෙවියන්ට දුන් අම්මා රිමාන්ඩ්

ගාල්ල ප්‍රදේශයේ දේවස්ථානයක බිළිදෙකු අතහැර දමා යාම සම්බන්ධයෙන් එම බිලිඳාගේ මව රක්ෂිත බන්ධනාගාර ගත කර තිබේ.

ගාල්ල මහේස්ත්‍රාත් තාමර තෙන්නකෝන් මහතා‍ වෙත ඉදිරිපත් කිරීමෙන් පසු සැකකාරිය ලබන 11 වැනිදා දක්වා රක්ෂිත බන්ධනාගාර ගත කරන ලෙස නියෝග කර ඇත.

දින 03 ක් වයසැති බිළි‍ඳෙකු දේවස්ථාන භූමියේ අතහැර ගිය එම බිලිඳාගේ මව ගාල්ල පොලිසිය විසින් අත්අඩංගුවට ගනු ලැබුවේ ඊයේ දිනයේදීය.

ඇය කළුවැල්ල ප්‍රදේශයේ පදිංචිකාරියක වන අතර බිලිඳා මේ වන විට කරාපිටිය රෝහලට ඇතුළත් කර තිබේ....

තව කියවන්න.. »