හිතු මනාපෙට තෙල් ගොඩබාන්නෙත් නෑ-බෙදාහරින්නෙත් නෑ

කොළොන්නාව සහ මුතුරාජවෙල තෙල් ගබඩා සංකීර්ණයෙන් බෙදාහරින පෙට‍්‍රල්, ඞීසල්, භූමිතෙල් ගොඩබෑම හා බෙදාහැරීම සිදුකෙරෙන්නේ ස්වාධීන පරීක්‍ෂණ කණ්ඩායම් මගින් තහවුරු කිරීමෙන් පමණක් බව ලංකා ඛනිජ තෙල් සංස්ථාව පවසයි.

ගොඩබෑමෙන් පසුද කොළොන්නාව හා සපුගස්කන්ද රසායනාගාර පරීක්‍ෂණ මගින්ද එහි ගුණාත්මක භාවය පිළිබඳ තහවුරු කර ගන්නා බවත්, ලංකා ඛනිජ තෙල් තොග ගබඩා පර්යන්ත සමාගම ඉන්ධන දිවයින පුරා බෙදාහැරීම සිදුකරනු ලබන්නේ එයින් අනතුරුව බවත් ඛනිජ තෙල් සංස්ථාව සභාපති එම්.ආර්.ඩබ්ද සොයිසා මහතාගේ අත්සනින් යුතුව නිකුත් කළ නිවේදනයක සඳහන් වේ.

එහෙයින් දැනට බෙදාහරින ඉන්ධන නියමිත පිරිවිතරයෙන් යුක්ත බවට සහතික කරන බවත්,ලංකා ඛනිජ තෙල් සංස්ථාවේ හා ලංකා ඛනිජ තෙල් තොග ගබඩා පර්යන්ත සමාගමේ සභාපතිවරු ඇතුළු ප‍්‍රධානීන්ගේ අධීක්‍ෂණයෙන් දැනට තෙල් ආනයනය හා බෙදාහැරීම සිදුකෙරෙන බවත් සභාපතිවරයා එමගින් කියා සිටියි.

එමිරේට්ස් ජාතික තෙල් සංස්ථාවෙන් ගෙන්වූ ඞීසල් මෙන්ම සියලූම තෙල් සැපැයුම්කරුවන්ගෙන් ආනයනය කරන ඉන්ධන වර්ග නියමිත පරීක්‍ෂණවලින් පසුව පිරිවිතර ගැළපේ නම් පමණක් නිකුත් කරන බව ඔහු අවධාරණය කරයි.