12:43 PM
Sandaruwan
ඡායා රූ-නක්කීරන් වෙබ් අඩවියෙන් උපුටා ගැනුණි.
ශ්‍රී ලංකාවේ මුහුදු සීමාව උල්ලංඝණය කළ බවට චෝදනා නඟා ඉන්දීය ධීවරයින් අත්අඩංගුවට ගෙන ඇතැයි සඳහන් කරමින් හා ශ්‍රී ලංකා රජයේ ක්‍රියා කලාපයට එරෙහිව ද්‍රවිඩ මුන්නේත්‍ර කලහම්(ඩී.එම්.කේ)විසින් පවත්වන ලද උද්ඝෝෂණයේ දී විරෝධතාකරුවන් දහසකට වැඩි පිරිසක් අත්අඩංගුවට ගෙන තිබේ.
එහිදී තමිල්නාඩු ප්‍රධාන අමාත්‍ය එම්.කරුණානිධි ගේ දියණිය වන එම්.කේ කනිමොහ්ලි ද අත්අඩංගුවට පත්වූවන් අතර වන බව ඉන්දීය මාධ්‍ය උපුටා දක්වයි.
අද(16)පෙරවරුවේ රාජ්‍ය සභා මන්ත්‍රීවරියක වන එම්.කේ කනිමොහ්ලි ගේ නායකත්වයෙන් චෙන්නායිහි,මයිලපූර්-නායේෂ්වරා උද්‍යානයෙන් ආරම්භ වූ මෙම විරෝධතා පා ගමන ඉන්දියාවේ ශ්‍රී ලංකා මහ කොමසාරිස් කාර්යාලය දක්වා පැමිණ තිබේ.
ශ්‍රී ලංකා මහ කොමසාරිස් කාර්යාලය ඉදිරිපිටදී මාධ්‍යවේදීන් අමතා අදහස් දක්වමින් ප්‍රධාන අමාත්‍යවරයාගේ දියණිය සඳහන් කර ඇත්තේ ශ්‍රී ලංකා නාවික හමුදාවන් විසින් දිගින් දිගටම ඉන්දීය ධිවරයින්ට සිදුකරන අකටයුතු කම් පිළිබඳ නිසි ක්‍රියාමාර්ගයක් ගැනීමට වගකිවයුත්තන් කටයුතු කර නොමැති බවයි.
කෙසේ වුවද ශ්‍රී ලංකා මහකොමසාරිස් කාර්යාලය ඉදිරිපිට මෙම විරෝධතා ව්‍යාපාරය පවත්වාගෙන යන අතරතුරදී තමිල්නාඩු ප්‍රධාන අමාත්‍ය එම්.කරුණානිධි ගේ දියණිය වන,රාජ්‍ය සභා මන්ත්‍රී එම්.කේ කනිමොහ්ලි,ඩී.කේ.එස් ඉලංගෝවන්,ජේ.ඇන්බලහොන් යන උදවියද සමග දහසකට වැඩි පිරිසක් ඉන්දීය පොලීසිය විසින් අත්අඩංගුවට ගත් බව නක්කීරන් වෙබ් අඩවිය පෙන්වාදෙයි.
ඒ සමගම සාමකාමීලෙස විරෝධතාවයේ යෙදුණු මෙම පිරිස අත්අඩංගුවට ගැනීම තමා කිසි සේත්ම අනුමත නොකරන බව සඳහන් කරමින් තමිල්නාඩු ප්‍රධාන අමාත්‍යවරයා නිවේදනයක් නිකුත් කර ඇති බවද සඳහන් වේ.
ඉන්දීය ධීවරයින් ශ්‍රී ලංකා රජය විසින් අත්අඩංගුවට ගැනීම හා රඳවා තබා ගැනීම ඉන්දීය ධීවරයින්ට එරෙහි ශ්‍රී ලංකා නාවික හමුදා විසින් මෙතෙක් ගෙන ඇති ක්‍රියා මාර්ග වලම ඉදිරි පියවරක් බවටද,ඉන්දීය ධීවරයින්ට එල්ල කර ඇති චෝදනා අසත්‍ය බවද මෙම විරෝධතා ව්‍යාපාරය සංවිධානය කළ ඩී.එම්.කේ විසින් චෝදනා කර තිබේ..
ශ්‍රී ලංකාවේ මුහුදු සීමාවට ඇතුළු වී නීති විරෝධී ලෙස ධීවර කටයුතු වල නිරත වූ ඉන්දීය ධීවරයින් 112 දෙනෙකු ඊයේ(15) රාත්‍රීයේ අත්අඩංගුවට ගත් බව නිවේදනය කෙරුණු අතර මෙම පිරිස සම්බන්ධයෙන් මේ වන විට ශ්‍රී ලංකා රජය නිල වශයෙන් ඉන්දීය ධීවර කටයුතු අමාත්‍යංශය දැනුවත් කර තිබේ.
Wednesday, February 16, 2011
ශ්‍රී ලංකාවට එරෙහිව උද්ඝෝෂණයේ යෙදුණු මහ ඇමති දියණිය ඇතුළු දහසක් අත්අඩංගුවේ..!
0 comments:
Post a Comment