බන්ධනාගාර නිලධාරීන්ගේ රාජකාරියට බාධා කිරී‍ම -පරීක්ෂණ ඇරඹෙයි

සරත් ෆොන්සේකා මහතා කොළඹ පෞද්ගලික රෝහලකට රැගෙන ගිය අවස්ථාවේ දී බන්ධනාගාර නිලධාරීන්ගේ රාජකාරියට බාධා කිරී‍මේ සිද්ධියක් සම්බන්ධයෙන් පරීක්ෂණ ආරම්භ කර ඇති බව කොළඹ අපරාධ කොට්ඨාශය කොටුව මහේස්ත්‍රාත් අධිකරණයට දැනුම් දී තිබේ.

අදාළ බන්ධනාගාර නිලධාරීන් සිදුකළ පැමිණිල්ලකට අනුව පොලිසිය අධිකරණය හමුවේ ‍එම කරුණු වාර්තා කර ඇති බව සඳහන්ය.

සරත් ෆොන්සේකා මහතා රෝහලට රැගෙන ගිය අවස්ථාවේ කිහිලිකරුවකින් පැමිණි පුද්ගලයෙකු සහ කැමරාවක් අතින් ගත් පුද්ගලයෙකු තම රාජකාරියට බාධා කළ බව බන්ධනාගාර නිලධාරීන් පොලිසියට පැමිණිලි කර ඇත.

මේ පිළිබඳ පරීක්ෂණ සිදුකිරීම සඳහා ඊට අදාළ වීඩියෝ පට ලබාදෙන ලෙස නියෝගයක් පනවන ලෙස පොලිසිය අධිකරණයෙන් ඉල්ලීමක් කර තිබිණි.

ඒ අනුව එම වීඩියෝ පට ලබාදෙන ලෙස අදාළ අංශ වෙත අධිකරණය නියෝග කර ඇත.